Rehabilitasaun Eskola Ensino Básiku No 21, Suco Vatuvoro,

Fundasaun Roman Foun ba Futuru, liu husi Fundu Dezenvolvimentu Integradu Ministerio Edukasaun halo rehabilitaaun ba Eskola Ensino Basiku No 21 iha Suco Vatuvoro. Programa ida ne'e hanesan programa komunitaria hodi apoiu fasilitadade edukasaun ba komunidade no alunos iha area refere. 

Programa rehabilitasaun ne'e komesa hahu iha loron 12 Agusto 2014 ho total orsamentu hamutuk US$ 121,870.00. Iha prosesu konstrusaun no rehabilitasaun ne'e inklui halo sala 3, sentina haat no fornese material eskritoriu, kadeira no meja ba alunos sira. NGO Roman Foun ba Futuru mos sei koordena hamutuk ho Professores no Conselho dos Pais atu bele koalia hamutuk kona-ba prosesu manutensaun ba eskola refere hafoin intrega ba eskola. 

Tuir programa, prosesu konstrusaun ne'e sei remata iha fulan Novembro 2014. Diretor Fundasaun Roman Foun ba Futuru informa katak, projetu sei remata tuir orariu ne'ebe termina ona. Sira sei konsulta ho Departemento Edukasaun Municipio Liquica inklui autoridade lokal sira hodi apoiu no finaliza programa ne'e tuir planu ne'ebe deside ona. 

Diretor Francelino hateten, "Fundu ba projetu ida ne'e mai husi Governo RDTL. Ita tenta fundu sira hanesan bele lori duni benefisiu ba povu. Tanba ne'e kualidade ba projetu ida nee ami sei tau atensaun makas hodi garante nia utlizasaun ba tempu naruk. Iha prosesu ne'e tomak ami sei koordena ho Departementu Edukasaun no autoridade lokal hanesan Chefe, Suco, Chefe de Posto, Chefe Aldeia, Diretor Eskola, Professores no Conselho dos Pais atu bele hamutuk halo monitoriasaun no avaliasaun", tenik Sr. Francelino. 

Sr. Francelino aumenta tan katak, sira espera katak programa nee bele remata tuir tempu no orariu ne'ebe Ministerio Edukasaun haruka. Hanesan akordu nebe termina ona, eskola ida sei remata nia konstrusaun fisiku iha fim fulan Novembro 2014. 

NGO Roman Foun ba Futuru hanesan organiasaun non governmental ida ne'ebe servisu iha Munisipiu Liquica. Programa NGO ne'e inklui apoiu konstrusaun fisiku ba eskola rural sira liu husi kapasidade ne'ebe NGO ne'e hanesan halo estudu, dezenho proposal no halo aprosimasaun ho Doadores ou Governo hodi fo tulun ba komunidade remotas sira ne'ebe presiza duni apoiu no atensaun husi Governo no Doador (LJ).